ዐውደ ርእዩን የርዕሰ አድባራት ጽርሐ አርያም ቅድስት ሥላሴ ካቴድራል አስተዳዳሪ መልአከ አርያም ቆሞስ አባ ኃይለሚካኤል ሙላት የደብሩ አገልጋይ ካህናትና ምእመናን በተገኙበት በጸሎት የከፈቱ ሲሆን ከመክፈቻው ሥነ-ሥርዓት በኋላም ዐውደ ርእዩን  እየተዘዋወሩ ጎብኝተዋል።  በተጨማሪም በሴንት ፖል ከተማ የምትገኘው የደብረ ገነት ቅድስት ማርያም ቤተክርስቲያን አስተዳዳሪ መልአከ ገነት ቆሞስ አባ ዘርዓ ዳዊት ብርሃኔ ከአጥቢያው ካህናትና ምዕመናን ጋር በመሆን ዐውደ ርእዩን ጎብኝተዋል።

ዐውደ ርእዩ በአጠቃላይ የኢትዮጵያ ኦርቶዶክስ ተዋሕዶ ቤተ ክርስቲያንን ገዳማትና የአብነት ትምህርት ቤቶች የትምህርት እና የኑሮ ሁኔታ፣ ተግዳሮቶች እንዲሁም ማኅበረ ቅዱሳን በእነዚህ የቤተ ክርስቲያን ተቋማት ላይ እየሠራቸው ያሉትን የረዥምና የአጭር ጊዜ ፕሮጀክቶች እና የተገኙ ውጤቶች በስምንት ትዕይንቶች ተከፍለው የቀረቡበት ሲሆን እነዚህም፤

ዐውደ ርእዩን የበለጠ ድምቀት እንዲኖረው ካደረጉት ትዕይንቶች ዋነኛው የቅድስት ሥላሴ ቤተ ክርስቲያን አገልጋይ ዲያቆናት በራሳቸው አነሳሽነት በአንድ አገልጋይ ካህን መምህርነት የአብነት ትምህርት አሰጣጥ ሂደትን በተዘጋጀላቸው ጎጆ ሥር ሆነው ሲማሩ ማቅረባቸው ነበር። ይህም ምዕመናን ቤተ ክርስቲያናችን የምታፈራቸው ሊቃውንት በምን ዓይነት ሁኔታ ተምረው ለማዕረግ እንደሚደርሱ በተግባር እነዲገነዘቡት አድርጓቸዋል።  ጥቂት የማይባሉ ምዕመናንም ደስታቸውን በእንባ ገልጸው፣ ይህን የመሳሰሉ መርሐ ግብሮችን ደጋግሞ እንዲያቀርብላቸው ጠይቀው አስፈላጊ በሆኑ ጉዳዮችም ለመርዳት ፈቃደኝነታቸውን ገልጸዋል። ቃለ መጠይቅ የተደረገላቸው አባቶች እና ምዕመናን ስለ ገዳማትና የአብነት ትምህርት ቤቶች ሰፊ ግንዛቤ እንዲያገኙ ያስቻላቸው መሆኑን አስረድተዋል። 

በዐውደ ርእዩ ለምዕመናን ገለጻ በማድረግ እና በማስተባበር የሁለቱም አጥቢያዎች ሰንበት ትምህርት ቤት አባላት፣ ምዕመናን እና የንዑስ ማዕከሉ አባላት  ከፍተኛ አስተዋጽዖ ያበረከቱ ሲሆን በዚሁም የአገልግሎት አንድነታቸውን በተግባር አሳይተዋል።

በመርሐ ግብሩ ፍጻሜም የንዑስ ማዕከሉ ተወካይ ለዐውደ ርእዩ መሳካት ከካህናት ጀምሮ የሰበካ ጉባኤ አባላት፣ የሰንበት ትምህርት ቤት አባላትና ምዕምናን በሙሉ ላደረጉት አስተዋጽዖ እና ትብብር ከፍተኛ መንፈሳዊ ምሥጋና  አቅርበዋል።