የኢትዮጵያ ቤተ ክርስቲያን ራሷን ከቻለችበት ከ1951 ዓ.ም ጀምሮ በመደበኛነት ቢያንስ በዓመት ሁለት ጊዜ የቅዱስ ሲኖዶስን ምልዓተ ጉባኤ ታደርጋለች፡፡ ቅዱስ ሲኖዶስም የቤተ ክርስቲያኒቱ የመጨረሻ ውሳኔ ሰጪና ሕግ አውጪ አካል በመሆኑ ባለፉት ዘመናት መልካም ውሳኔዎችን አሳልፏል፡፡ መመሪያዎችንም አውጥቷል፡፡ ከአጥቢያ ቤተ ክርስቲያን እስከ መንበረ ፓትርያርክ ጠቅላይ ጽቤት ሁሉም አካላት በመመሪያውና በውሳኔው መሠረት ሙሉ ለሙሉ እየፈፀሙ ነው ባይባልም፤ ቤተ ክርስቲያናችንን አሁን ያለችበት ደረጃ ላይ አድርሰዋታል፡፡ በዚህ ወሳኝ ወቅት ከቅዱስ ሲኖዶስ ብዙ የሚጠበቅ ነው፡፡ ሥልጣኔና ዘመናዊነት በበረታበት በአሁኑ ወቅት በዓለማችን ላይ ብዙ ፈተናዎች ይከሰታሉ፡፡ በቅዱስ ሲኖዶስ የምትመራው የኢትዮጵያ ቤተ ክርስቲያንም በዓለም ላይ ያለች በመሆኗ በዘመኑ የመጡ ፈተናዎችና ችግሮች ሁሉ ይጋረጡባታል፡፡

 /ዲ/ን ዮሴፍ አዱኛ /

ቅድስት ቤተ ክርስቲያን ካህናት አባቶችን ለአገልግሎት የምትሾምበት ሰማያዊ ሥርዓት አላት፡፡ እነዚህን ሥርዓተ ቤተ ክርስቲያን ማብራራት የዚህ ጽሑፍ ዓላማ አይደለም፡፡

ጠቅለል ባለ መልኩ ግን በቤተ ክርስቲያናችን ላይ የሚሾሙ አባቶች መንጋውን ለመጠበቅ፣ ሕይወታቸውን ለቤተ ክርስቲያን አገልግሎት ለመስጠት፣ ለመለየት፣ በቤተ ክርስቲያንና በምእመናን ፊት ቃል ይገባሉ፡፡ ቃል ኪዳናቸውም በእግዚአብሔርና በሰማያውያን ፊት መሆኑ ይታወቅ ዘንድ በሰማያዊው መሰዊያ ፊት በአባቶች አንብሮተ እድ ፀጋ መንፈስ ቅዱስን ይቀበላሉ፡፡ በዚህ መልኩ ይህን ሰማያዊ የአገልግሎት ሹመት ይቀበላሉ፡፡

የቤተ ክርስቲያን አባቶች አገልግሎታቸውን በአግባቡ እንዲፈጸሙ ምን ያስፈልጋቸዋል?